maj112023
Antikoagulantët oralë reduktojnë komplikimet te diabetikët me fibrilacion atrial
Një studim i botuar në "Annals of Internal Medicine", tregon se përdorimi i antikoagulantëve oralë jo antagonistë të vitaminës K (NOAC) te pacientët me fibrilacion atrial dhe diabet, lidhet me një rrezik më të ulët të ndërlikimeve të diabetit dhe vdekshmërisë sesa varfarina.
"Pacientët e diagnostikuar me fibrilacion atrial kanë më shumë mundësi të pësojnë një iktus me kalimin e viteve dhe për të parandaluar këtë ngjarje shpesh për ta përshkruhen antikoagulantë oralë afatgjatë, përfshirë varfarinën dhe NOAC", shpjegon autori kryesor i studimit Yu-Kang Tu nga Universiteti Kombëtar i Tajvanit.
"Diabeti është gjithashtu i zakonshëm në mesin e këtyre pacientëve, me një status të ulët glicemik i cili i vë ata në rrezik të tromboembolizmit dhe vdekshmërisë kardiovaskulare", vijon eksperti. Është e paqartë se cili antikoagulant lidhet me një rrezik më të ulët të komplikimeve për këta pacientë, dhe për këtë arsye, studiuesit krahasuan rreziqet e ndërlikimeve të diabetit dhe vdekshmërisë midis pacientëve me fibrilacion atrial dhe diabet pa sëmundje renale në fazën përfundimtare të trajtuar me NOAC dhe atyre të menaxhuar me varfarin, duke përdorur të dhënat nga Baza e të Dhënave Kërkimore të Sigurimeve Shëndetësore Kombëtare të Tajvanit.
Ndërmjet 19,909 përdoruesve të NOAC dhe 10,300 përdoruesve të varfarinës të vëzhguar, ata që merrnin NOAC kishin rrezik dukshëm më të ulët për të qenë viktima të komplikimeve makrovaskulare dhe mikrovaskulare, shqetësimit glicemik dhe vdekshmërisë nga të gjitha shkaqet.
Disa analiza mbështetën qëndrueshmërinë e rezultateve. Edhe pse studimi nuk ishte në gjendje të përcaktonte mekanizmat e saktë me anë të të cilëve u arritën rezultate më të mira te përdoruesit e NOAC, autorët sugjerojnë se ndër faktorët që kontribuojnë në këto rezultate mund të jenë efektet e dobishme të vitaminës K në ndjeshmërinë ndaj insulinës dhe tolerancën ndaj glukozës, dhe ndryshimi në mekanizmin antikoagulant midis NOAC dhe varfarinës.
"Rezultatet tona sugjerojnë se NOAC-të mund të jenë një zgjedhje më e mirë terapeutike për këtë grup pacientësh", përfundojnë studiuesit.