shk152021
Përzierja e antitrupave kundër varianteve të Covid-19 dhe përdorimi i tocilizumabit. Bëhen hapa para në kërkime
Variantet e Sars-Cov2 kanë ndezur alarmin edhe në vendet ku vaksinimi po ecën më shpejt. Kjo është arsyeja pse për ta bërë më të vështirë zhvillimin e mutacioneve, kompanitë farmaceutike Eli Lilly and Company, Vir Biotechnology dhe GlaxoSmithKline kanë njoftuar një bashkëpunim për të vlerësuar kombinimin e dy antitrupave të ndryshëm monoklonalë. "Me një virus si Sars-CoV-2, pritet se mund të shfaqen variante që kërkojnë mundësi të reja terapeutike. Kjo është arsyeja pse Lilly po studion bamlanivimabin së bashku me antitrupa të tjerë neutralizues, përfshirë etesevimabin. Shtimi i VIR-7831 në studimin tonë është i rëndësishëm për trajtimin e shtameve aktuale dhe të ardhshme të Covid-19", tha Daniel Skovronsky, shefi shkencor dhe presidenti i Lilly Research Laboratories.
Bamlanivimabi (LY-CoV555) 700 mg me VIR-7831 (i njohur edhe si GSK4182136) 500 mg, janë dy antitrupa që lidhen me epitopet e ndryshme (proteinat sipërfaqësore) të proteinës kunj Sars-CoV-2. Bamlanivimabi është një antitrup i drejtuar kundër proteinave kunj të Sars-CoV-2 i krijuar për të bllokuar sulmin viral dhe hyrjen në qelizat njerëzore, duke neutralizuar kështu virusin. VIR-7831 është një antitrup monoklonal me veprim të dyfishtë, i zgjedhur për zhvillimin klinik bazuar në potencialin e tij për të bllokuar hyrjen virale në qeliza të shëndetshme dhe për të vrarë qelizat e infektuara, si dhe potencialin për të siguruar një pengesë të lartë ndaj rezistencës.
Administrata Amerikane e Ushqimit dhe e Barnave (FDA) dha autorizimin e përdorimit emergjent për antitrupat e Eli Lilly-t bamlanivimab (LY-CoV555) 700 mg dhe etesevimab (LY-CoV016) 1400 mg së bashku. Terapia autorizohet për trajtimin e Covidit të butë deri të moderuar në pacientët 12 vjeç e lart, me rrezik të lartë të përparimit në sëmundje të rëndë ose shtrim në spital. Ndërkohë në Mbretërinë e Bashkuar, një studim ka treguar se administrimi i një bari të përdorur për trajtimin e artritit reumatoid te pacientët me Covid në gjendje të rëndë, mund të zvogëlojë ndjeshëm rrezikun e vdekshmërisë, në krahasim me terapinë standarde: për çdo 25 pacientë të trajtuar me tocilizumab, një antitrup monoklonal, përdorur përveç steroidëve rutinë, është përllogaritur se arrin të shpëtojë një jetë më shumë. Jo vetëm kaq: pacientët e mjekuar u rikuperuan më shpejt, duke ulur me një të katërtën shtrimet në terapinë intensive.