maj102021
Barnat anti-Covid. FDA-ja përshpejton terapitë e përshtatura për fëmijët
Përballë mbi 31 milionë rasteve dhe më shumë se 564,000 vdekjeve të shkaktuara vetëm në Shtetet e Bashkuara nga pandemia Covid-19, Administrata e Ushqimit dhe e Barnave (FDA) ka krijuar Programin e Përshpejtimit të Trajtimit të Coronavirusit (Coronavirus Treatment Acceleration Program-CTAP), që synon përshpejtimin e zhvillimit të trajtimeve të reja anti Sars-CoV-2. Më shumë se 600 barna janë në zhvillim e sipër dhe CTAP-i ka shqyrtuar mbi 400 prova klinike mbi barnat kundër coronavirusit, shumë prej të cilave janë aprovuar nga FDA-ja ose janë autorizuar për përdorim urgjent (EUA).
Këto përfshijnë remdesivirin, një medikament intravenoz që pengon replikimin viral, të aprovuar nga FDA-ja për fëmijët e shtruar në spital, 12 vjeç ose më shumë, me peshë 40 kg ose më shumë të cilët kërkojnë oksigjen shtesë, ventilim mekanik invaziv ose oksigjenim të membranës ekstrakorporeale (ECMO). Remdesiviri, nga ana tjetër, është në EUA për fëmijët e shtruar në spital nën 12 vjeç, me peshë midis 3.5 dhe 40 kg, të cilët kërkojnë mbështetje respiratore. Duhet të theksohet se asnjë studim nuk ka treguar aftësinë e remdesivirit për të reduktuar vdekshmërinë e lidhur me Covid-19. Nga ana tjetër, është miratuar vetëm për përdorim jashtë etiketës (off-label), deksametazoni, një kortikosteroid që përdoret shpesh në pediatri për të trajtuar sëmundjet e zakonshme inflamatore dhe i testuar gjerësisht në pacientët me Covid-19. Përdorimi i tij lejohet për fëmijët e shtruar në spital, pa kufij të moshës, të cilët kërkojnë oksigjen shtesë, ventilim mekanik invaziv ose ECMO.
Në EUA, për trajtimin anti-Covid-19 ka edhe disa barna të tjera, duke përfshirë baracitinibin, një frenues i janus kinazës, i përdorur për të trajtuar artritin reumatoid, i aprovuar kundër Covid-19 për fëmijët e shtruar në spital, mbi 2 vjeç dhe në oksigjenoterapi, ventilim mekanik invaziv ose ECMO. Nga ana tjetër, janë të ndryshme kriteret e përshkrimit për dy kombinime me bazë antitrupash monoklonalë, përkatësisht, bamlanivimab/etesevimab dhe casirivimab/imdevimab, që do të përdoren për pacientët ambulatorialë të moshës 12 vjeç e më shumë dhe me peshë 40 kg ose më shumë dhe të testuar pozitivisht për SARS-CoV-2, të cilët janë në rrezik të lartë të përparimit në infeksion të rëndë dhe/ose shtrim në spital. Këta antitrupa lidhen me virusin dhe zvogëlojnë sasinë e lirë të pranishme në rrugët e frymëmarrjes. Bamlanivimabi kishte marrë më parë nga FDA-ja një EUA, që më pas u tërhoq për shkak të shtimit të varianteve dhe rrezikut të dështimit të trajtimit kur administrohet i vetëm.
APP News: https://www.aappublications.org/news/2021/04/23/focus-covid-therapeutics-041921
FDA: https://www.fda.gov/drugs/coronavirus-covid-19-drugs/coronavirus-treatment-acceleration-program-ctap