dhj202022
Infeksionet pediatrike akute. Evropa aprovon antibiotikun e gjeneratës së re
Agjencia Evropiane e Barnave (EMA) ka ndezur një dritë jeshile për zgjerimin e indikacioneve të dalbavancinës, antibiotikut të gjeneratës së re, për trajtimin e pacientëve pediatrikë me infeksione bakteriale akute të lëkurës dhe indeve të buta, sipas Angelini Pharma.
Infeksionet bakteriale akute të lëkurës dhe indeve të buta variojnë në ashpërsi nga të lehta deri në kërcënuese për jetën, me një ndikim të madh në kostot e kujdesit shëndetësor. Ato shkaktojnë rreth 70% të shtrimeve në spital për shkak të infeksioneve të lëkurës në Evropë dhe Staphylococcus Aureus rezistent ndaj meticilinës (MRSA) është përgjegjës për mbi 10% të këtyre rasteve.
Dalbavancina, e miratuar nga EMA për të rriturit në vitin 2015, gjithashtu dallon nga antibiotikët e gjeneratës së vjetër për shkak të veprimit të tij të zgjatur kundër shumicës së shtameve të Staphylococcus Aureus rezistente ndaj antimikrobikëve të tjerë.
Studimet e mëparshme in vitro kanë treguar se dalbavancina është 16 herë më efektive krahasuar me agjentët e tjerë si: vankomicina dhe linzolidi. Për më tepër, mund të administrohet me infuzion në një dozë të vetme, duke favorizuar kështu reduktimin e kohës së qëndrimit në spital.
"Dalbavancina mund të jetë e dobishme për trajtimin e infeksioneve të karakterizuara nga rezistenca ndaj antibiotikëve, të cilat fatkeqësisht po bëhen gjithnjë e më të shpeshta edhe në moshën pediatrike", tha Luisa Galli, ish-presidentja e Shoqatës Italiane të Sëmundjeve Infektive të Pediatrisë.
Zgjerimi i indikacioneve të dalbavancinës te foshnjat mbi 3 muajsh, një lipoglikopeptid baktericid i gjeneratës së re, veprimi i të cilit është të prishë sintezën e murit qelizor në bakteret e ndjeshme, bazohet në rezultatet e një studimi shumëqendror të fazës III.
"Pacientët pediatrikë janë ndër më të rrezikuarit për t'u prekur nga sëmundjet infektive. Dalbavancina është një molekulë e njohur për nga efikasiteti dhe siguria për përdorim te të rriturit dhe tani më në fund do të përdoret edhe te fëmijët", tha Michela Procaccini nga Angelini Pharma.