sht232022
Mëngjesi i bollshëm mund të pakësojë oreksin, por nuk ndikon te pesha
Sipas një studimi të botuar në Cell Metabolism, marrja e sasive më të mëdha të kalorive në fillim të ditës nuk ndikon në metabolizmin e tyre, edhe pse një mëngjes i bollshëm i bën njerëzit të ndihen më pak të uritur gjatë ditës.
"Ka shumë hipoteza, të bazuara kryesisht në ritmin cirkadian, se si kohët e ndryshme të ditës në të cilat hamë mund të ndikojnë në peshën trupore ose shëndetin tonë", thotë bashkëautorja Alexandra Johnstone nga Instituti Rowett në Universitetin Aberdeen në Skoci, e cila së bashku me kolegët e saj vendosën të sqarojnë këtë temë duke rekrutuar 16 burra dhe 14 gra të shëndetshëm, obezë ose mbipeshë, për të kontrolluar dietat dhe për të matur metabolizmin e tyre me kalimin e kohës.
Secilit pjesëmarrës u përzgjodh në mënyrë rastësore për të ndjekur një dietë në mëngjes ose në mbrëmje, të dyja izokalorike, për katër javë. Dietat përmbanin 30% proteina, 35% karbohidrate dhe 35% yndyrë. Pas një periudhe pastrimi (washout) 7-ditore, secili pjesëmarrës kaloi në dietën e kundërt për katër javë të tjera. "Në ekuilibër ne vumë re se shpenzimi i energjisë dhe humbja e peshës ishin të njëjta si për dietën e mëngjesit ashtu edhe për atë të darkës, me një humbje mesatare peshe prej pak më shumë se 3 kg të arritur në secilën prej periudhave katër javore", vazhdon autorja, duke shpjeguar se parametrat sekondare të efikasitetit ishin: kontrolli subjektiv i oreksit, kompensimi i glicemisë dhe përbërja trupore.
"Pjesëmarrësit raportuan një kontroll më të mirë të oreksit në ditët kur hanin një mëngjes të madh, duke u ndjerë të ngopur gjatë pjesës tjetër të ditës", shkruajnë autorët, duke spekuluar se kjo lloj diete mund të aplikohet në studimin e agjërimit me ndërprerje, për të identifikuar kohën më të mirë të ditës për të optimizuar konsumin e kalorive.
"Si përfundim, duke pasur parasysh uljen e oreksit të raportuar nga pjesëmarrësit, një mëngjes i bollshëm mund të jetë një mënyrë e dobishme për të humbur peshë në mënyrë indirekte, të qenit më pak i uritur në mbrëmje mund të çojë në një marrje të reduktuar të kalorive gjatë gjithë ditës", thekson Johnstone.
Cell Metabolism 2022. Doi: 10.1016/j.cmet.2022.08.001
https://doi.org/10.1016/j.cmet.2022.08.001