dhj52022
Alzheimeri. Një medikament i ri mund të ngadalësojë rënien konjitive
Lecanemabi, një medikament i ri eksperimental kundër sëmundjes së Alzheimerit, mund të ngadalësojë përparimin e sëmundjes, sipas rezultateve të një prove klinike të publikuar nga kompanitë farmaceutike Eisai dhe Biogen. Medikamenti duket se ka ngadalësuar avancimin e problemeve konjitive të pacientëve në fazat e hershme të sëmundjes.
Medikamentet e disponueshme aktualisht në treg që trajtojnë simptomat e Alzheimerit, nuk janë shumë efektive kundër sëmundjes, veçanërisht në format e saj më të avancuara. Për këtë arsye, grupe të ndryshme kërkimore kanë punuar prej disa kohësh në përpjekje për të ndërhyrë në shkaqet e sëmundjes, të cilat ende nuk janë plotësisht të qarta.
Lecanemabi, i njohur edhe me emrin BAN2401, është një antitrup monoklonal i "humanizuar" që synon të ndryshojë biologjinë themelore të Alzheimerit, duke ngadalësuar përparimin e sëmundjes kur ndërhyhet në një fazë të hershme. Lecanemabi sulmon beta amiloidin që grumbullohet në trurin e njerëzve me Alzheimer.
Rezultatet e studimit të ri klinik, të paraqitur në konferencën e provave klinike mbi sëmundjen e Alzheimerit në San Francisko, u botuan në New England Journal of Medicine. Rezultatet nga studimi i Fazës 3 që përfshiu gati 1800 pjesëmarrës me Alzheimer në fazën e hershme gjatë një periudhe 18-mujore treguan se terapia reduktoi bioshënjuesit e lidhur me beta amiloidin në Alzheimer të hershëm dhe rezultoi në një rënie më të vogël në matjet e aftësive konjitive dhe funksionale për pjesëmarrësit që morën placebo.
Pacientët e trajtuar me lecanemab përjetuan një rënie të aftësive konjitive 27% më ngadalë krahasuar me grupin e kontrollit.
Pas infuzionit intravenoz, i cili u administrua çdo dy javë, disa pacientë raportuan simptoma të ngjashme me gripin, të cilat u reduktuan gjatë trajtimit me infuzionet e mëvonshme.
Medikamenti gjithashtu ka rezultuar në efekte negative serioze, si akumulimi i lëngjeve në tru dhe hemorragji cerebrale. Efektet anësore më serioze ndodhën në 14% të pacientëve që morën lecanemab dhe 11% të atyre që morën placebo. Pak më pak se 7% e pjesëmarrësve në studim me medikamentin aktual u larguan nga prova për shkak të efekteve anësore të padëshiruara, rreth dy herë më shumë se ata që morën placebo.
Për momentin, nuk bëhet fjalë për një kurë të re për Alzheimerin, dhe do të nevojiten studime të reja klinike për të konfirmuar efikasitetin dhe sigurinë e Lecanemabit. Megjithatë, siç shpjegohet nga studiuesit, të dhënat që dalin nga provat klinike janë një rezultat ngushëllues, i cili inkurajon kërkimin për të shkuar më tej në synimin për të arritur në një kurë për Alzheimerin sa më shpejt të jetë e mundur.
Të dhënat tashmë po vlerësohen nga FDA-ja e SHBA-ve me vendimin që pritet në fillim të vitit 2023. Kompanitë farmaceutike Eisai dhe Biogen gjithashtu planifikojnë të fillojnë procesin e miratimit në vende të tjera që në fillim të vitit të ardhshëm.