tet282020
Coronavirusi. AIFA ndez dritën jeshile për studimin e barit që përdoret kundër osteoporozës
Agjencia Italiane e Barnave AIFA ka ndezur dritën jeshile për nisjen e një studimi klinik që do të vlerësojë një produkt me bazë raloxifene, një bar i autorizuar për trajtimin e osteoporozës te gratë në post menopauzë, te pacientët me Covid-19 me simptoma të lehta të shtruar në spital ose në shtëpi. Studimi, i promovuar nga konsorciumi publik-privat Exscalate4Cov dhe dorëzuar në AIFA nga Dompé, udhëheqësi i konsorciumit, do të drejtohet nga Irccs Lazzaro Spallanzani i Romës dhe Humanitas Rozzano (Milano).
Studimi, i cili mund të shtrihet në qendra të tjera në Itali dhe jashtë saj, do të duhet të verifikojë sigurinë dhe efikasitetin e raloxifenit në frenimin e replikimit të virusit Sars-CoV-2. Studimi është përshtatës dhe mund të përfshijë deri në 450 pacientë që do të marrin trajtim me kapsula orale raloxifene ose placebo për 7 ditë. Dosja e patentës për përdorimin e raloxifenit për trajtimin e infeksionit të coronavirusit, thuhet në shënim, u paraqit më 6 maj nga Dompé, Instituti Fraunhofer dhe Universiteti i Leuvenit (Belgjikë), me qëllim promovimin e një qasjeje universale në trajtimet që mund të rrjedhin prej tij, siç përcaktohet nga udhëzimet e konsorciumit Exscalate4CoV, i përbërë nga 18 institucione nga 7 vende evropiane dhe mbështetur nga thirrja e Komisionit Evropian Horizon 2020 për projekte që synojnë luftimin e pandemisë dhe përmirësimin e menaxhimit e kujdesit ndaj pacientit.
"Është e rëndësishme të nënvizohet, specifikojnë promovuesit e studimit, që deri më sot nuk ka ende asnjë provë që raporti përfitim/rrezik i molekulës ndaj Sars-CoV-2 është pozitiv, as mbi dozën që do të përdoret. Për këtë arsye, bari nuk është i autorizuar për përdorim në këtë indikacion jashtë një studimi klinik".
Rezultati i njoftuar sot, vazhdon shënimi, është rezultat i përfundimit të fazës 1 të projektit Exscalate4CoV, që do të kryejë një shqyrtim në 400 mijë molekula (barna tashmë të aprovuara dhe produkte natyrore të sigurta për njerëzit) dhe një test specifik për të vlerësuar 10 mijë molekula premtuese. Të dhënat e gjeneruara deri më tani nga Exscalate4CoV, 10 artikuj të rishikuar nga kolegët (10 të tjerë në fazën e finalizimit), prova shkencore nga mbi 20 mijë eksperimente in vitro dhe rindërtimi dixhital i virusit Sars-CoV-2 mbi të cilin do të kryheshin simulime të reja, janë vënë në dispozicion të bashkësisë shkencore ndërkombëtare përmes portalit www.mediate.exscalate4cov.eu.