sht232019
Rrezik papastërtish kancerogjene. AIFA tërheq barnat me ranitidinë
AIFA ka urdhëruar tërheqjen nga farmacitë dhe nga zinxhiri i shpërndarjes, i të gjitha grupeve të barnave me përbërësin aktiv ranitidine (e përdorur për të trajtuar problemet e stomakut, siç është aciditeti) të prodhuara nga Saraca Laboratories Ltd në Indi. Në bazë të urdhrit të tërheqjes është prania e një papastërtie potencialisht kancerogjene.
Kjo është papastërtia N-nitrosodimethylamine (NDMA) e klasës së nitrosaminave, e gjetur edhe më parë (2018) te disa antihipertensivë (Sartane). AIFA po punon me agjenci të tjera, për të vlerësuar shkallën e ndotjes.
Vendimi u mor në bazë të parimit paraprak, me qëllim minimizimin e rreziqeve për pacientin, duke kufizuar ekspozimin ndaj substancës potencialisht të dëmshme. Si masë parandaluese, AIFA ka ndaluar gjithashtu përdorimin e të gjitha loteve të shitura në Itali të barnave që përmbajnë ranitidinë, por të prodhuara nga kompani të tjera farmaceutike, përveç SARACA LABORATORIES LTD, në pritje të analizimit të tyre.
Edhe në BE ka patur lëvizje të tilla. Masa të ngjashme janë marrë ose janë në proces miratimi në vende të tjera të BE-së dhe në disa vende jashtë Evropës. Ranitidina është një frenues i sekretimit acid që përdoret në trajtimin e ulcerave, refluksit gastroezofageal, urthit dhe kushteve të tjera që lidhen me hipersekretimin e acidit dhe tregtohet në Itali si medikament pa recetë, ashtu edhe si bar për vetëmjekim, në formë tabletash, shurupi ose solucionesh të injektueshme për përdorim intravenoz.
NDMA-ja klasifikohet si një substancë potencialisht kancerogjene për njeriun nga Agjencia Ndërkombëtare për Kërkime mbi Kancerin (IARC) e OBSH-së, në bazë të studimeve të kryera mbi kafshët. Është e pranishme në disa ushqime dhe në ujë, por nuk pritet të shkaktojë dëme kur gëlltitet në sasi shumë të ulëta.
"Mos e ndalni mjekimin, telefonojini mjekut tuaj", këshillon AIFA qytetarët që janë nën trajtimin me një medikament me bazë ranitidine, të përshkruar nga mjeku i tyre. Ajo u kërkon atyre të mos e ndalin trajtimin, por të këshillohen me mjekun e tyre sa më shpejt të jetë e mundur për një trajtim alternativ (një bar tjetër i ndryshëm nga ranitidina, i indikuar në trajtimin e gjendjeve në të cilat stomaku prodhon sasi të tepërt acidi).
Janë gjithsej 195 lote barnash që përmbajnë substancën aktive ranitidinë, të tërhequr nga tregu. Në veçanti, bëhet fjalë për disa lote nga këto barna:
- RANITIDINA HEX (150 MG E 300 MG)
- RANITIDINA RATIOPHARM (150 MG E 300 MG)
- RANITIDINA MYLAN GENETICS 150 MG E 300 MG)
- RANIDIL SHURUP
- ZANTAC TABLETA (150 MG E 300 MG)
- ZANTAC AMPULË 5 ML
- ZANTAC TABLETA QË SHRIHEN NË UJË (150 MG)
- RANITIDINA AUROBINDO ITALIA (150 MG E 300 MG).
Shoqata e konsumatorëve Codacons njofton ndërkohë se është e gatshme të "nisë punën në terren për të mbrojtur pacientët italianë, të cilëve u janë dhënë barna që përmbajnë përbërësin aktiv ranitidinë, që tani janë tërhequr nga tregu". Shoqata gjithashtu i kërkon Ministrisë së Shëndetësisë të "konstatojë nëse ka pasur vonesa ose dështime në sistemet e sigurisë mbi barnat, para se të arrihen masat e miratuara sot nga AIFA".