pri92024
Depresioni. FDA miraton terapinë e re digjitale
Administrata e Ushqimit dhe Barnave (FDA) në SHBA i ka ndezur dritën jeshile përdorimit të Rejoyn, trajtimit të parë digjital përshkrues për çrregullimin depresiv madhor. Rejoyn është një aplikacion në celular, i projektuar për t'u përdorur njëkohësisht me barnat antidepresive nga individët 22 vjeç e lart, të cilët janë diagnostikuar me çrregullim depresiv madhor.
Depresioni është një nga çrregullimet e shëndetit mendor më të përhapura në SHBA, me më shumë se 18% të të rriturve që shfaqin simptoma depresive, apo që ndjekin trajtime specifike për këtë sëmundje, sipas një raporti të vitit 2023. Megjithatë, jo më shumë se 30% e individëve që ndjekin terapi farmakologjike antidepresive reagon pjesërisht ndaj trajtimit, duke shfaqur përsëri simptoma depresive. Rejoyn është zhvilluar për të shoqëruar antidepresivët në momentin që pacienti reagon pjesërisht ndaj trajtimit.
Sinergjia e trajnimit konjitive-emotiv dhe e trajtimit të terapisë konjitive të sjelljes
Rejoyn ofron një program gjashtë javor, i cili e ndërthur qasjen e re të quajtur trajnim konjitiv-emotiv me leksionet e terapisë konjitive të sjelljes. Duke u klasifikuar si pajisje mjekësore me rrezik të ulët-mesatar, Rejoyn ka marrë miratimin e FDA, duke demonstruar "barazi" me pajisje të tjera të tregtuara dhe duke garantuar siguri dhe efikasitet. Aplikacioni vë në zbatim një lloj trajnimi konjitiv-emotiv të quajtur Emotional Faces Memory Task, i cili nxit zona specifike të trurit të përfshira në depresion, të tilla si amigdala dhe korteksi paraballor dorso-lateral. Në momentin që krijohen lidhje më të forta e më të qëndrueshme, zonat e trurit, përgjegjëse për përpunimin dhe rregullimin e emocioneve, janë në gjendje të funksionojnë më mirë së bashku dhe simptomat e depresionit mund të përmirësohen.
Evidenca klinike të një studimi real-world
Autorizimi i FDA për përdorimin e Rejoyn u lëshua në bazë të rezultateve të një studimi klinik, në të cilin u përfshinë 386 individë të moshave 22-64 vjeç, që vuanin nga çrregullimi depresiv madhor dhe nuk reagonin ndaj antidepresivëve. Synimi kryesor i studimit ishte ndryshimi i pikëve të plota të Montgomery-Asberg Depression Rating Scale (MADRS) që nga fillimi e deri pas 6 javësh. Studimi zbuloi se pacientët e trajtuar me Rejoyn shfaqën përmirësim të simptomave depresive, i cili është mbajtur vazhdimisht nën vëzhgim përmes shkallës MADRS, shkallës së depresionit me nëntë elementë të Patient Health Questionnaire (PHQ-9) dhe shkallës Clinical Global Impression-Severity (CGI-S). Gjithastu, pacientët e trajtuar me Rejoyn shfaqën përmirësim edhe një muaj pas përfundimit të programit fillestar 6-javor dhe nuk u konstatuan efekte anësore të rënda nga trajtimi gjatë periudhës së studimit.
Perspektiva të ardhshme dhe nevoja për studime të mëtejshme
Miratimi i Rejoyn shënon një hap të rëndësishëm drejt zbatimit të teknologjive digjitale në trajtimin e depresionit madhor. Megjithatë, nevojiten studime të mëtejshme për të konfirmuar efikasitetin afatgjatë të zbatimit dhe për të vlerësuar ndikimin e tij në praktikën klinike dhe te pacientët. Kështu, Rejyon, së bashku me trajtimin standard, mund të përbëjë një burim të çmuar për përmirësimin e jetës së miliona individëve të prekur nga depresioni në të gjithë botën.