kor292019
Infeksioni i traktit urinar dhe antibiotikët. FDA-ja aprovon kombinimin e ri
Është aprovuar kombinimi i barnave imipenem, cilastine dhe relebactam në një solucion të vetëm injektues, për trajtimin e infeksioneve të komplikuara të traktit urinar dhe intra-abdominal te pacienti i rritur. Kjo bëhet e ditur nga Administrata e Ushqimit dhe e Barnave (FDA) përmes një shënimi zyrtar.
Medikamenti, që rrjedh nga kombinimi i dy antibiotikëve të miratuar më parë, imipenem dhe cilastin dhe një frenuesi të ri të beta-laktamazave, relebactam, ka një efikasitet të demonstruar nga rezultatet e arritura tashmë në fazën e studimit nga dy antibiotikët. Sa i përket komponentit të tretë, relebaktami ka rezultuar i sigurt dhe efektiv në disa studime in vitro dhe mbi kafshët. Formulimi përfundimtar ishte objekt i dy studimeve, një për infeksionet urinare dhe një për infeksionet intra-abdominale. I pari përfshinte 298 raste, nga të cilat 99 u trajtuan me injeksione të barit të ri; i dyti, 347 pacientë, nga të cilët 117 janë trajtuar me formulimin. Reagimet më të shpeshta negative ishin: të përzierat, diarreja, dhimbja e kokës, ethet dhe aktiviteti i rritur i enzimës hepatike. FDA-ja specifikon që trajtimi duhet të shmanget te pacientët që trajtohen me ganciklovir, acid volproik ose divalproeks.
Bari është i njohur si produkt i kualifikuar për trajtimin e sëmundjeve infektive (QUIDP), bashkë me antibakterialët dhe antifungalët që trajtojnë infeksione potencialisht vdekjeprurëse dhe si i tillë, është objekt i ekzaminimit prioritar nga ana e organit të kontrollit.
"Ne vazhdojmë angazhimin tonë për të lehtësuar zhvillimin e antibakterialëve të sigurt dhe efektivë, duke u siguruar pacientëve sa më shumë mjete për të luftuar infeksionet serioze", tha Ed Cox, drejtor i Zyrës për Produktet Antimikrobike në Qendrën për Vlerësim dhe Kërkim në FDA. "Megjithatë, është e rëndësishme që përdorimi i këtij medikamenti të kufizohet në situata ku alternativat janë të pakta ose joefikase".