tet152018
EMA: Të kufizohet përdorimi i dy klasave të antibiotikëve. Janë të rrezikshëm për shëndetin
Komisioni për vlerësimin e rreziqeve për farmakovigjilencën (PRAC) i Agjencisë Evropiane të Barnave (EMA) ka rekomanduar kufizimin e përdorimit të antibiotikëve fluoroquinolone dhe quinolone (të përdorur nga goja, me injeksion apo inhalim), si rezultat i një shqyrtimi të efekteve anësore paaftësuese dhe potencialisht afatgjata, të raportuara nga përdorimi i tyre. Rishikimi ka kombinuar pikëpamjet e pacientëve, profesionistëve të shëndetit dhe hulumtuesve akademikë, të paraqitura në një seancë publike. Ka rezultuar se, ndonëse shumë rrallë, pacientët e trajtuar me antibiotikët fluoroquinolone ose quinolone, kanë patur efekte anësore dhe paaftësuese për një kohë të gjatë, që përfshijnë kryesisht muskujt, tendinat e kockat, si edhe sistemin nervor. Pas vlerësimit të këtyre efekteve anësore, PRAC-u ka rekomanduar heqjen nga tregu të disa barnave të autorizuara vetëm për infeksionet, që nuk duhet të trajtohen më me këtë klasë antibiotikësh.
Komiteti i Ekspertëve rekomandon që antibiotikët e mbetur fluorokinolone të mos përdoren: për të trajtuar infeksionet që mund të përmirësohen pa trajtim ose jo të rënda (të tilla si infeksionet e fytit); për të parandaluar diarrenë e udhëtarit ose infeksionet e përsëritura të traktit urinar të poshtëm (infeksionet e urinës që nuk shtrihen përtej fshikëzës); trajtimin e pacientëve të cilët kanë pasur më parë efekte të rënda anësore me një antibiotik fluorokinolone ose kinolone; për trajtimin e infeksioneve të lehta ose të moderuara, përveçse nëse nuk mund të përdoren barna të tjera antibakteriale që rekomandohen zakonisht për këto infeksione. PRAC-u rekomandon gjithashtu që këto produkte mjekësore të përdoren me kujdes sidomos te të moshuarit, pacientët me probleme të veshkave, pacientët që kanë bërë transplant të organeve, ose tek ata që janë trajtuar me një kortikosteroid sistemik. Këta pacientë janë në rrezik më të lartë për dëmtime të tendinit, të shkaktuara nga antibiotikët fluoroquinolone dhe kinolone. Rekomandimet e PRAC-ut tani do t'i dërgohen Komitetit të Produkteve Mjekësore për Përdorim Njerëzor (CHMP) të EMA-s, i cili do të miratojë opinionin përfundimtar të agjencisë.