qer252021
Vitamina D, opioidet dhe rrezet UV. Një studim nxjerr në pah lidhjet e mundshme
Vitamina D mund të jetë çelësi për të shpjeguar të paktën pjesërisht dëshirën për t'u ekspozuar në diell, por edhe varësinë nga opioidet, sipas një botimi në "Science Advances". "Për të luftuar epideminë aktuale të opioideve, është e nevojshme të identifikohen dhe studiohen më mirë faktorët gjenetikë dhe mjedisorë që kontribuojnë në varësinë ndaj këtyre substancave", thonë autorët e koordinuar nga David Fisher (Spitali i Përgjithshëm i Masaçusetsit në Boston), një ndër autorët e hulumtimit.
Falë një qasjeje të bazuar si në modelet e kafshëve, ashtu edhe në testet e kryera te njerëzit, Fisheri dhe ekipi i tij u përpoqën të kuptonin më mirë lidhjen midis sinjaleve që lidhen me vitaminën D dhe sjelljeve që çojnë në ekspozimin ndaj rrezeve UV dhe ndaj opioideve. Në të vërtetë, në një punim të mëparshëm, autorët kishin treguar se ekspozimi ndaj rrezeve ultraviolet (veçanërisht UVB) përcakton prodhimin e endorfinës, një molekulë e ngjashme kimikisht me morfinën, heroinën dhe opioidet e tjera. "Të gjitha këto molekula aktivizojnë të njëjtët receptorë", shpjegojnë autorët, të cilët në një studim tjetër treguan se si ekspozimi në rrezet ultraviolet rrit nivelet e endorfinës te minjtë dhe si ata shfaqën më pas sjellje të ngjashme me atë të varësisë nga opioidet. Në studimin e sapobotuar, Fisheri dhe kolegët vëzhguan se duke modifikuar nivelet e vitaminës D te minjtë mund të ndryshohen sjelljet e varësisë nga rrezet UV dhe opioidet. "Minjtë me nivele të ulëta të vitaminës D treguan një tendencë të vazhdueshme për të kërkuar më shumë morfinë kur ekspozoheshin ndaj dozave të ulëta të opioideve, gjë që është më pak e zakonshme te minjtë me nivele normale të vitaminës D", shpjegojnë studiuesit, duke theksuar se në mungesën e vitaminës D, ndikimi i opioideve është më i fortë. Rezultatet sugjerojnë një rol të mungesës së vitaminës D në zhvillimin e sjelljeve të varësisë dhe gjithashtu te njerëzit, të dhënat duket se udhëheqin në të njëjtin drejtim. Prevalenca e çrregullimit të përdorimit të opioideve në fakt ishte më e lartë në subjektet me mungesë të vitaminës D dhe gjithashtu u vu re një lidhje e kundërt e varur nga dozimi midis niveleve të vitaminës D dhe përdorimit të vetëraportuar të opioideve. Është gjithashtu interesante të përmendet se analgjezia dhe përgjigjet e shpërblimit të gjeneruara nga rrezet UV shtypen nga sinjalizimi i vetë vitaminës D, gjë që sugjeron ekzistencën e një reagimi negativ: kur organizmi ka sintetizuar mjaftueshëm vitaminë D falë ekspozimit ndaj rrezeve UV, dëshira për ekspozim ndalet.
"Ndryshe nga çfarë ndodh me rrezet UVB, përdorimi i opioideve ekzogjene nuk është i lidhur me një prodhim pasues të vitaminës D dhe kështu, nuk nis reagimi negativ", thonë studiuesit, të cilët më pas përfundojnë: "Këto rezultate mund të hapin rrugën për terapitë me vitaminë D, për të luftuar përdorimin dhe varësinë nga opioidet, por nevojiten njohuri të mëtejshme për të kuptuar se kush mund të përfitojë nga kjo qasje".
Sci Adv. 2021. Doi: 10.1126/sciadv.abe4577
https://advances.sciencemag.org/content/7/24/eabe4577