kor302019
Hipoglicemia e rëndë. Aprovohet nga FDA-ja trajtimi i parë pluhur, në formulim nazal
Administrata e Ushqimit dhe e Barnave (FDA) ka bërë me dije miratimin e trajtimit të parë të emergjencës për hipogliceminë e rëndë te pacientët me moshë 4 ose më shumë vjeç. Administrimi i glukagonit në formë pluhuri, do të bëhet në rrugë nazale, duke e bërë të panevojshëm injeksionin.
Hipoglicemia e rëndë
Siç shpjegohet në njoftimin zyrtar të entit të kontrollit në SHBA, hipoglicemia e rëndë jepet në rastet e nivelit të ulët të sheqerit në gjak. Kjo gjendje, që ndodh në mënyrë të përsëritur te pacientët me diabet për shkak të trajtimit me insulinë, mund të shkaktojë konfuzion dhe humbje të vetëdijes, duke e bërë të nevojshme ndërhyrjen e një personi tjetër, për të ofruar ndihmë.
Glukagoni në formë pluhuri nazal
Ndryshe nga glukagoni i injektueshëm, Baqsimi (ky është emri i barit të Eli Lilly and Company, miratuar nga FDA-ja) është një pluhur nazal i ruajtur në ambalazhim një përdorimësh: kështu, është më praktik në marrjen gjatë një episodi hipoglicemik. Bari vepron duke rritur nivelin e sheqerit në gjak, përmes stimulimit të mëlçisë, që lëshon në gjak glukozën e depozituar. Efikasiteti dhe siguria e glukagonit në formën e pluhurit nazal është vlerësuar në dy studime me 83 dhe 70 pacientë të rritur dhe në një studim me 48 pacientë pediatrikë (mbi 4 vjeç): krahasuar me një dozë të vetme të glukagonit të injektuar, bari ka dhënë përgjigje pozitive në drejtim të rritjes së sheqerit në gjak, kundrejt hipoglicemisë së shkaktuar nga insulina.
"Kjo mënyrë e re e administrimit të glukagonit do të thjeshtojë procesin, i cili mund të jetë i ndërlikuar gjatë një episodi hipoglicemik, pasi pacienti mund të humbasë vetëdijen", shpjegoi Janet Woodcock, drejtore e Qendrës për Kërkimin dhe Zhvillimin e Produkteve Mjekësore në FDA. "Në këto situata, ne duam që procesi i trajtimit të jetë sa më i thjeshtë".
Paralajmërime dhe efekte anësore
Siç shpjegon FDA-ja, bari nuk duhet të merret nga pacientët me feokromocitomë (tumor i rrallë i indit të gjëndrës mbiveshkore), me insulinomë, ose me mbindjeshmëri të njohur ndaj glukagonit (që mund të shkaktojë reaksione alergjike). Paralajmërimi fton përdorimin me kujdes në rast të qëndrimit të zgjatur pa ngrënë, ose insuficiencës surenale, ose hipoglicemisë kronike, meqenëse këto kushte shkaktojnë pamjaftueshmëri të glukozës në mëlçi, duke qenë kështu të papërshtatshme për të garantuar efikasitetin e barit. Reagimet më të shpeshta anësore përfshijnë nauze, të vjella, dhimbje koke, acarim të traktit të sipërm të frymëmarrjes, marramendje, skuqje të syve dhe kruajtje.