tet112022
Mikrobiota intestinale. Përfitimet nga majaja dhe pija e fermentuar Kombucha
Kombucha është një pije e përbërë nga çaji i fermentuar dhe disa bimë aromatike, përmban 58 lloje majash, shumë prej të cilave janë të dobishme për mikrobiotën intestinale humane.
Një grup shkencëtarësh nga Departamenti i Shkencave Bujqësore, Ushqimore dhe Agro-mjedisore të Universitetit të Pizës studiuan dhe përshkruan për herë të parë popullsinë e mikroorganizmave të pranishëm në këtë pije dhe studimin e publikuan në International Journal of Food Microbiology.
Majaja dhe funksionet e saj të rëndësishme për zorrët
Kombucha është një pije paksa e ëmbël dhe e gazuar e përbërë nga çaji jeshil dhe bimët aromatike si: verbena e limonit, malva, trëndafili i qenit dhe nenexhiku. Përveç majave, në studim u izoluan dhe u karakterizuan edhe disa lloje bakteresh laktike dhe acetike, të cilat kontribuojnë në formimin e shijes dhe aromës së pijes.
"Studimi i ADN-së tregoi se shumica e këtyre majave nuk korrespondojnë me ato të përdorura për prodhimin e verës, birrës dhe bukës", shpjegojnë studiuesit.
Prandaj, ato janë maja tipike që marrin pjesë në fermentimin e llojeve të tjera të Kombuchas dhe të pijeve shumë të veçanta si birra Lambic, një nga më të vjetrat e prodhuara në Belgjikë dhe e marrë nëpërmjet fermentimit spontan, ose si vera e akullit, një verë e marrë nga fermentimi rrushit të ngrirë dhe të korrura në fillim të stinës së dimrit.
Shumë nga këto maja kanë treguar se janë të afta të prodhojnë ekzopolisakaride, substanca dietike me funksione të rëndësishme në zorrën tonë dhe mund të testohen më tej për aftësinë e tyre për të mbijetuar në traktin gastrointestinal, duke luajtur kështu rolin e probiotikëve. "Është e rëndësishme të theksojmë se Kombucha përfaqëson një pije të fermentuar që nuk rrjedh nga produktet shtazore, si kosi dhe kefiri dhe mund të përdoret nga personat vegan ose intolerant ndaj laktozës, si një alternativë ndaj konsumit të produkteve të qumështit të fermentuar", përfundojnë autorët.
International Journal of Food Microbiology
https://doi.org/10.1016/j.ijfoodmicro.2022.109934