maj292017
Konsumi i peshkut krudo, shtohen rastet me infeksion nga Anisakis
Shtohen rastet me infeksion nga Anisakis, të shkaktuara nga një paraziti nematod, që strehohet në pjesët e konsumueshme të peshkut dhe molusqeve.
Alarmin e radhës e jep një artikull i British Medical Journal Case Reports, që sjell rastin e një burri 32 vjeç, të shtruar me dhimbje abdominale dhe temperaturë, të cilit iu gjet një larvë e parazitit në mukozën gastrike dhe që raportoi se kishte ngrënë peshk krudo.
Infeksioni i njohur me emrin anisakidoza, është një prej zoonozave më të zakonshme ushqimore. Prania e këtyre parazitëve në mishin e peshqve konsiderohet normale, por është shkak sëmundjeje te njeriu. Rruga kryesore e kontaminimit, është në fakt konsumi i peshkut të pa gatuar dhe frutave të detit të kontaminuara. Rastet më të shpeshta janë përshkruar në Japoni, ku për shkak të zakonit për të konsumuar peshkun krudo, sëmundja është shumë e përhapur.
Siç raportojnë autoritetet shëndetësore evropiane, rastet me anisakidozë po shtohen shpejt edhe në Perëndim. Fenomeni duket se përhapet te personat që pëlqejnë kuzhinën japoneze me pjatat e saj tipike me bazë peshkun krudo: tartar, sushi dhe sashimi. Por në përgjithësi konsumi i llojeve të peshqve të pa gatuar apo të pa përpunuar siç duhet, cilado që të jetë përgatitja, ekspozon ndaj riskut.
Cilat janë masat që duhen marrë për të shmangur kontaminimin? Subjekte të infektimit janw veçanwrisht: peshku shpatë, skumbri, trofta, harenga, toni, sardelet, levreku, sepjet dhe kallamari. Në mishin e infektuar larvat janë pak të dukshme për syrin: të buta dhe të bardha, me përmasa 1 në 2 cm. Ndërsa trajtimet e tymosjes dhe marinimit nuk e vrasin larvën, nxehtësia (60°C për 3') dhe i ftohti arrijnë ta neutralizojnë.
Pikat tregtare që shesin peshk për konsum krudo, ose restorantet janë të detyruara ta venë në ngrirje me një modifikues të temperaturës, pajisje që lejon produktin të arrijë shpejt temperaturën e dëshiruar, dhe të ofrojnë prova që kjo procedurë ka ndodhur. Konsumi shtëpiak duhet të respektojë të njëjtat indikime: për të pasur garancinë që larvat e mundshme të vdesin, peshku duhet ngrirë në -18°C për të paktën 96 orë.
Francesca De Vecchi
Eksperte në shkencat dhe teknologjitë ushqimore