gus242016
Kanabinoid oral për të përzierat dhe të vjellat nga kimioterapia e anoreksia, aprovohet nga FDA
Administrata e Barnave dhe Ushqimeve (FDA) në Shtetet e Bashkuara ka aprovuar dronabinololin në solucion oral (Syndros prodhuar nga Insys Therapeutics, Inc) për trajtimin e anoreksisë në pacientë të prekur nga AIDS dhe për menaxhimin e të përzierave e të vjellave si pasojë e kimioterapisë te pacientët që nuk i përgjigjen ashtu si duhet terapive antihemetike (kundër të vjellave) konvencionale.
Bëhet fjalë për një formulim likuid të dronabinololit, një kanabinoid sintetik që përfaqëson një version farmaceutik të tetrahidrokanabinolit (Thc).
"Është solucioni i parë dhe i vetëm për përdorim oral të dronabinolit i aprovuar nga FDA, - thotë John N. Kapoor, president i kompanisë farmaceutike amerikane në një komunikatë për shtyp. - Lëngu mund të gëlltitet lehtësisht dhe është i mundur titrimi i dozimit për të arritur një efekt klinik". Për gjysmën e dytë të 2016-s kompania parashikon të lançojë produktin që aktualisht është në pritje të daljes së kalendarit të US Drug enforcement administration (Dea), enti që mbikëqyr ligjet në lidhje me drogat dhe substancat në Shtetet e Bashkuara.
Përdorimi i dronabinolit mund të shkaktojë efekte psikiatrike dhe konjitive dhe të dobësojë aftësitë mendore ose ato fizike. Kompania sinjalizon se pacientët me çrregullime kardiake mund të kenë hipertension, hipotension, sinkopë dhe takikardi. Njoftohet pastaj se nevojitet të pezullohet përdorimi i barnave që përmbajnë disulfiram apo metronidazol të paktën 14 ditë para administrimit të kanabinoidit dhe që të njëjtat substanca nuk duhet të administrohen për 7 ditë pas përfundimit të trajtimit me dronabinol. Gjithashtu para përshkrimit të kanabinoideve, te pacientët me anamnezë pozitive për konvulsione, duke përfshirë ata që kanë nevojë për farmakoterapi antiepileptike ose me faktorë të tjerë që reduktojnë kufirin konvulsiv - duhet të vlerësohet gjithmonë raporti mes risqeve potenciale dhe përfitimeve.
Pacientët me histori varësie apo abuzimi substancash duhet të vlerësohen për riskun e abuzimit apo përdorimit të papërshtatshëm të dronabinolit para se mjeku të vendosë ta përshkruajë. Sipas kompanisë, këto subjekte duhet të monitorohen për zhvillimin e mundshëm të sjelljeve ose kushteve të lidhura.
Nëse simptomat e të përzierave, të vjellave apo dhimbjeve së barkut do të përkeqësohen gjatë trajtimit me barin, duhet të merret në konsideratë një reduktim i dozës ose ndërprerja e trajtimit.