kor282020
Coronavirusi. Ja, barnat që bllokojnë përsëritjen. Rezultati i studimeve klinike
Kërkimi i armëve të reja të mundshme kundër Covid-19 vazhdon në të gjithë botën. Në Itali, me miratimin e tre studimeve të fundit, shkon në 38 numri i studimeve klinike të nisura, ndërsa lajme të mira vijnë nga Shtetet e Bashkuara, ku janë identifikuar 21 barna ekzistuese që kanë treguar se mund të bllokojnë përsëritjen e Sars-CoV-2. Ky është rezultat i një studimi të botuar në revistën "Nature", që është realizuar përmes skrinimit të gjerë të 12,000 molekulave.
Remdesiviri, trajtimi standard aktual për Covid-19, "ka treguar me sukses shkurtimin e kohës së rimëkëmbjes për pacientët në spital, por bari nuk funksionon për të gjithë ata që e marrin atë", thotë Sumit Chanda, profesor në Institutin Mjekësor Discovery, Kaliforni, autor i studimit të ri. Ekipi ndërkombëtar i hulumtimit ka kryer teste të gjera, përfshirë vlerësimin e biopsive të mushkërive të infektuara me virus, duke u bazuar në një nga bazat e të dhënave më të mëdha të barnave (ReFrame). Kështu, u identifikuan 100 molekula me aktivitet antiviral të konfirmuar nga laboratori. Nga këto, 21 kanë rezultuar të efektshme në bllokimin e replikimit Sars-Cov-2, në doza që sigurojnë sigurinë e pacientit. Për më tepër, 4 prej këtyre funksionuan në sinergji me remdesivirin, përfshirë hanfangchin A (tetrandrine), një antimalarik që ka arritur provat klinike të fazës 3. "Ky studim zgjeron në mënyrë të konsiderueshme opsionet e mundshme terapeutike, veçanërisht për shkak se shumë nga molekulat kanë tashmë të dhëna klinike të sigurisë te njerëzit", thotë Chanda. "Bazuar në analizën tonë, shton ai, klofazimina, hanfangchin A, apilimod dhe Ono5334 paraqesin opsionet më të mira afatshkurtra". Aktualisht, studiuesit po testojnë të 21 përbërjet në modelet e kafshëve dhe në organoide pulmonare, të cilat imitojnë indet njerëzore.
Në Itali, ku pandemia është tani nën kontroll, vazhdojnë studimet e nisura dhe kohët e fundit, tre janë autorizuar nga Agjencia Italiane e Barnave (AIFA) dhe nga Komiteti Kombëtar i Etikës. I pari është një studim i fazës II mbi efikasitetin dhe sigurinë e Acalabrutinibit, një frenues i tirozinës kinaze Bruton, që u shtohet terapive më të mira mbështetëse. I dyti është një studim shumëqendror i fazës II për trajtimin me Interferon-1a, që promovohet nga Spitali "San Raffaele", Irccs në Milano. I treti është një studim i fazës II/III, i cili vlerëson efikasitetin dhe sigurinë e ABX464, një molekulë ende në eksperimentim dhe të dhënat in vitro të së cilës tregojnë një efekt të mundshëm antiviral të dyfishtë dhe reduktim të përgjigjes inflamatore.