qer262019
AIFA: Biotina ndërhyn në rezultatin e analizave laboratorike. Të informohen konsumatorët
Marrja e biotinës do të ndërhynte në disa teste laboratorike, duke çuar në rezultate të gabuara të larta ose të ulëta, gjatë analizave të rëndësishme klinike. Këto rezultate mund të kenë si pasojë menaxhimin jo të mirë të pacientit, bazuar në një diagnozë të gabuar. Kjo është përmbajtja e shënimit të Agjencisë Italiane të Barnave (AIFA), që përmban informacione mbi rrezikun dhe procedurat që u kërkohen profesionistëve të kujdesit shëndetësor dhe pacientëve.
Biotina, kujton shënimi i AIFA-s, është një vitaminë e tretshme në ujë, e grupit B, që përdoret në trajtimin e sëmundjeve të lëkurës ose si suplement vitaminik. Bëhet fjalë për një substancë që e përmbajnë shumë integratorë ushqimorë në dozën e sigurisë inferiore 150 mcg (forma orale) dhe 60 mcg (format parentale).
Sipas shënimit të AIFA-s, kjo substancë do të ndërhynte me metodat e analizës të bazuara në ndërveprimin streptavidinë-biotinë, që zakonisht përdoren në praktikën klinike për dozimin e hormoneve, shënuesve kardiakë, tumoreve, infeksionet dhe për monitorimin e barnave. Në varësi të llojit të shqyrtimit, vlerat mund të rriten ose të ulen në mënyrë të rreme, duke çuar në një keqdiagnostikim që rezulton në trajtim të papërshtatshëm. Shembulli i raportuar nga organi i kontrollit është ai i vlerave të gabuara të troponinës, të cilat mund të çojnë në mosdiagnostikimin e infarktit të miokardit ose në rezultate të rreme në kontekstin e analizave tiroide për sëmundjen Graves.
Rreziku i marrjes së rezultateve të rreme do të ishte më i lartë te pacientët me insuficiencë renale (përqendrime më të larta të biotinës në gjak), me sklerozë të shumëfishtë (nëse ekspozohen ndaj dozave të larta të biotinës, deri në 300 mg në ditë), fëmijët me sëmundje të rralla metabolike (mungesë e biotinidazës, mungesë e olocarboxilazë sintazës, ganglione bazale të ndjeshme ndaj biotinë-tiaminës).
Në komunikim, AIFA fton farmacistët "të informojnë konsumatorët, në rastin e blerjes së produkteve me bazë biotine si një komponent i vetëm ose në kombinim, lidhur me mundësinë që kjo të ndikojë në analiza". Nga ana tjetër, mjekët duhet të informohen mbi marrjen e mundshme të biotinës, para përshkrimit të analizave. Në rast përdorimi, mjeku do të duhet të kontaktojë personelin e laboratorit, i cili duhet të punojë për të parandaluar dhe zbuluar ndërhyrjen e biotinës (vlerësoni disponueshmërinë e testeve alternative). Por edhe pacientët, nëse marrin ose kanë marrë kohët e fundit biotinë, këshillohen që para se të bëjnë analizat e laboratorit, të informojnë mjekun ose stafin e laboratorit dhe nëse biotina merret për qëllime kozmetike, të ndërpritet para analizave laboratorike. Nëse biotina merret për qëllime terapeutike, mos e ndërprisni administrimin pa u konsultuar me mjekun.