dhj162021
Centella asiatica te pacientët epileptikë. Kujdes, nga ndërveprimi me barnat!
Centella asiatica është një bimë medicinale e njohur për vetitë e saj flebotonike, që lidhen me fraksionin e saj të triterpeneve. Në mjekësinë tradicionale indiane, nga edhe e ka origjinën, ajo përdoret në formën e ekstraktit, për veprimin e saj në sistemin nervor qendror, mes të cilave për epilepsinë, çrregullimet konjitive dhe sindromat e ankthit.
Vetëmjekimi me bimën
Ndër substancat bimore potencialisht të dobishme në trajtimin e disa formave të epilepsisë, kanë dalë sot të dhënat e sigurisë dhe efikasitetit të kanabidiolit, ndërsa mbeten ende për t'u përcaktuar profilet përkatëse, për shembull për Centellën, potenciali antikonvulsant i së cilës tashmë është testuar në modele eksperimentale.
Përdorimi i vetëmjekimit me produkte bimore është një praktikë shumë e zakonshme edhe mes pacientëve epileptikë dhe shpesh pa asnjë kontroll klinik, gjë që i bën edhe më të rëndësishme në këtë fushë kërkimet e para shkencore, përfshirë potencialin për ndërveprim midis Centella asiatica-s dhe barnave antiepileptike.
Të vlerësohen përfitimet e mundshme, por edhe rreziqet
Ne e kemi ditur prej kohësh që ekstraktet e centellës (e quajtur edhe gotu kola) frenojnë izoenzima të shumta të CYP450, në veçanti CYP2C9, CYP2D6 dhe CYP3A4, të përfshira gjithashtu në metabolizmin e dy barnave antiepileptike si valproati dhe fenitoina. Kjo ndodh veçanërisht për shkak të flavonoideve të pranishme dhe të nxjerra në mënyra të ndryshme nga tretës të ndryshëm. Interesante është vepra e Kumar et al. (2021) i cili testoi profilin e ndërveprimit të ekstraktit hidroalkoolik të gotu kolës me barna antiepileptike në modelet eksperimentale të epilepsisë te minjtë. Doza terapeutike dhe nën-terapeutike e valproatit dhe fenitoinës u administruan bashkë me Centellën dhe më tej u vlerësuan rezultatet. Barnat siguronin mbrojtje të plotë kundër krizave në doza terapeutike dhe përmirësonin mbrojtjen ndaj konvulsioneve në doza nënterapeutike. Autorët gjetën gjithashtu një rritje të konsiderueshme në nivelet serike të valproatit dhe fenitoinës. Prandaj, hulumtimi i duhur klinik bëhet i domosdoshëm, për të vlerësuar përfitimet e mundshme, por edhe rreziqet, për shembull, për shkak të rritjes së përqendrimit të barnave të marra së bashku me Centellën dhe pa dyshim, jo vetëm të antiepileptikëve. Ekstrakte të ndryshme të Centellës, për shembull, mund të frenojnë izoenzimat e tjera të CYP450, si 2D6, 2B1 dhe 2B2 dhe të rrisin aktivitetin farmakologjik, por edhe toksikologjik të barnave substrat. Prandaj, mbetet këshilla për të shmangur ekstrapolimet e improvizuara terapeutike dhe, për t'u thelluar në këtë temë.
Fabio Firenzuoli
Drejtor i CERFIT, AOU Careggi, Firence
Burimet
Kumar R. et al. Journal of Ethnopharmacology 2021, 270, 113784.
Lu CW, et al. Biomedicines. 2021, 10;9(3):284.
Visweswari G, et al. Epilepsy Behav. 2010, Mar;17(3):332-5.