kor152021
Vaksinat Covid. Sindroma neurologjike pas vaksinës J&J nën ekzaminimin e EMA-s
Pas disa rasteve me sindromën e rrallë neurologjike Guillain-Barrè, verifikuar në SHBA pas imunizimit anti-Covid me vaksinën me dozë të vetme J&J dhe vendimit pasues të Agjencisë Amerikane të Barnave (FDA) për ta përfshirë këtë patologji në fletën informative të vaksinës, çështja përfundon edhe nën lupën e Agjencisë Evropiane të Barnave, EMA.
FDA-ja, në fakt, ka bërë një paralajmërim të ri për vaksinën anti-Covid Johnson&Johnson, duke shpjeguar se mund të mbartë rrezikun e kësaj sëmundjeje të rrallë neurologjike. Rreziku është tre deri në pesë herë më i lartë midis atyre të vaksinuar me J&J sesa në popullatën e përgjithshme në SHBA. Deri më tani janë identifikuar rreth 100 raste, kryesisht te burrat, shumë prej të cilëve janë 50 vjeç ose më shumë. Shumica e pacientëve u shëruan, por është regjistruar edhe një vdekje. FDA-ja arriti në përfundimin se përfitimet e vaksinës në parandalimin e vdekjes ose formave të rënda të Covid-it ende tejkalojnë fuqimisht këtë rrezik, por vendosi të përfshijë paralajmërimin në fletët e informacionit. Edhe EMA njoftoi sot se "po analizon të dhënat e siguruara" nga Johnson & Johnson "mbi rastet e sindromës Guillain-Barrè të raportuara pas vaksinimit" me imunizuesin dhe i kërkoi kompanisë J&J të siguronte "të dhëna të hollësishme të mëtejshme". Aktualisht, bazat e të dhënave tregojnë se simptomat e sindromës zhvillohen brenda afërsisht tre javësh pas vaksinimit.