mar242021
EMA, kundër përdorimit të ivermektinës për parandalimin apo trajtimin e COVID-19, jashtë studimeve
EMA ka shqyrtuar evidencat më të fundit në lidhje me përdorimin e ivermektinës për parandalimin dhe trajtimin e COVID-19 dhe ka dalë në përfundimin se të dhënat e disponueshme nuk e mbështesin përdorimin e saj për COVID-19 jashtë studimeve të mirëmodeluara.
Në BE, tabletat e ivermektinës janë aprovuar për trajtimin e disa infeksioneve nga krimbat parazitarë, ndërkohë që përgatitjet me ivermektinë për lëkurën, janë aprovuar për të trajtuar gjendje të tilla si rozacea. Ivermektina është autorizuar edhe për përdorim veterinar, për një gamë të gjerë speciesh shtazore, për parazitë të brendshëm dhe të jashtëm.
Ivermektina nuk është e autorizuar për përdorim në COVID-19 në BE dhe EMA nuk ka marrë asnjë aplikim për përdorime të tilla.
Duke ndjekur raportet dhe publikimet e kohëve të fundit mbi përdorimin e ivermektinës, EMA ka shqyrtuar evidencat e fundit të publikuara në bazë të studimeve laboratorike, studimeve vëzhguese, eksperimentimet dhe metaanalizat. Studimet laboratorike kanë zbuluar se ivermektina mund të bllokojë replikimin e SARS-CoV-2 (virusi që shkakton COVID-19), por në përqendrime shumë më të larta sesa ato që arrihen përmes dozave aktuale të autorizuara. Rezultatet e studimeve klinike janë të ndryshme; disa studime nuk tregojnë asnjë përfitim dhe të tjera raportojnë përfitime të mundshme. Shumë nga studimet e shqyrtuara nga EMA ishin të vogla dhe kishin kufizime shtesë, duke përfshirë regjimet e dozimeve të ndryshme dhe përdorimin e mjekimeve të njëkohshme. Kështu, EMA ka arritur në përfundimin se evidencat e disponueshme aktualisht, nuk janë të mjaftueshme për të mbështetur përdorimin e ivermektinës në COVID-19 jashtë studimeve klinike.
Ndonëse ivermektina është përgjithësisht e mirëtoleruar në dozat e autorizuara për indikacione të tjera, efektet anësore mund të shtoheshin me doza më të mëdha që mund të jenë të nevojshme për të arritur në mushkëri ato përqendrime të ivermektinës që janë efikase kundër virusit. Kështu, pra, toksiciteti i ivermektinës, kur ajo përdoret në doza më të mëdha se ato të aprovuara, nuk mund të përjashtohet.
Në këtë mënyrë, EMA ka arritur në përfundimin se përdorimi i ivermektinës për parandalimin apo trajtimin e COVID-19, nuk mund të rekomandohet aktualisht, jashtë studimeve klinike të kontrolluara. Janë të nevojshme studime të mëtejshme të mirëmodeluara dhe me përzgjedhje rastësore, për të arritur në përfundime nëse produkti është efikas dhe i sigurt në parandalimin dhe trajtimin e COVID-19.
Kjo deklaratë publike e EMA-s është mbështetur nga Task Forca e saj Pandemike (COVID-ETF), në dritën e diskutimeve të vazhdueshme mbi përdorimin e ivermektinës në parandalimin dhe trajtimin e COVID-19.
Burimi: EMA