mar12021
Covid-19. Një frenues i interleukinës 1 është i aftë të ulë vdekshmërinë në raste të rënda
Frenimi i interleukinës 1 (IL-1), por jo interleukinës 6 (IL-6), është lidhur me një ulje të konsiderueshme të vdekshmërisë në pacientët e shtruar në spital me Covid-19 të rëndë, sipas një studimi të botuar në "Lancet". "Që në fillim u hipotezua se citokinat më të përfshira në procesin inflamator të Covid-19 ishin IL-1 dhe IL-6. Fakti që IL-1 është një shënjestër terapeutike, ndodh ndoshta për shkak të faktit se kjo molekulë i paraprin çlirimit të IL-6. Kjo do të thotë që është e rëndësishme të ndërhyhet, në mënyrë të shënjestruar, në rrjedhën e sipërme të kaskadës së sinjaleve inflamatore", thotë Lorenzo Dagna (Universiteti Vita-Salute San Raffaele), autor i studimit.
Studiuesit krahasuan frenimin e IL-1 dhe IL-6 në 392 pacientë të shtruar në spital me Covid-19, insuficiencë respiratore dhe hiper-inflamacion në Spitalin San Raffaele në Milano. Nga pjesëmarrësit, 275 nuk morën frenues të interleukinës, 62 morën frenuesin e IL-1 anakinra dhe 55 morën një frenues të IL-6 (29 tocilizumab dhe 26 sarilumab). Kështu, analiza shumë variabile tregoi se, krahasuar me pacientët që nuk kishin marrë frenues të interleukinës, pacientët e trajtuar me frenuesin e IL-1 kishin një rrezik të reduktuar ndjeshëm për vdekje, ndryshe nga ata të trajtuar me frenuesin e IL-6. Megjithatë, u zbulua se nuk kishte asnjë ndryshim në rezultatin klinik të pafavorshëm te pacientët e trajtuar me frenues të IL-1 ose frenues të IL-6, krahasuar me pacientët që nuk morën frenues të interleukinës.
Duke marrë parasysh rritjen e përqendrimeve të proteinës C-reaktive, ama, pacientët e trajtuar me frenues të IL-6 treguan një rrezik për vdekje dhe për rezultat klinik të reduktuar ndjeshëm në krahasim me pacientët që nuk morën frenues të interleukinës. Duke parë uljen e përqendrimeve të laktatit të dehidrogjenazës në gjak, pacientët e trajtuar me një frenues të IL-1 dhe pacientët e trajtuar me frenues të IL-6 kishin një rrezik më të ulët për vdekje. Në të kundërt, rritja e përqendrimeve të laktat dehidrogjenazës te pacientët që morën një nga frenuesit e interleukinës ishin të shoqëruara me një rrezik në rritje për vdekje dhe rezultat klinik të pafavorshëm krahasuar me pacientët që nuk kishin marrë frenues të interleukinës.
Lancet Rheumatology 2021. Doi: 10.1016/S2665-9913(21)00012-6
https://doi.org/10.1016/S2665-9913(21)00012-6