nën112020
Covid-19. FDA-ja miraton përdorimin emergjent të antitrupit monoklonal Eli Lilly
FDA-ja ka ndezur dritën jeshile për përdorimin emergjent të antitrupit monoklonal Eli Lilly për trajtimin anti-Covid-19, i destinuar për trajtimin e infeksioneve të lehta deri të moderuara, por në rrezik për sëmundje të rëndë, te pacientët e rritur ose fëmijët mbi 12 vjeç. Sipas "VVashington Post", ky është trajtimi i parë i bazuar në antitrupa monoklonalë të autorizuar për përdorim te pacientët.
Medikamenti, një antitrup i prodhuar në laborator, që imiton sulmin e sistemit imunitar ndaj virusit, është prodhuar nga Eli Lilly & Co. Sipas studiuesve, bëhet fjalë për një "klasë barnash që do të provojë se është një instrument i fuqishëm për të ndryshuar rrjedhën e pandemisë dhe mund të veprojë si urë drejt një vaksine", kujton "VVashington Post". "Ky është gjithashtu nga e njëjta familje barnash si trajtimi i marrë nga Presidenti Donald Tramp kur u godit nga Covid-19".
Por "mungesa fillestare e barit dhe ndërlikimet logjistike të administrimit të tij mund të pakësojnë ndikimin e tij të menjëhershëm në pandemi". Medikamenti, bamlanivimabi, duhet të administrohet me infuzion intravenoz në fillimin e sëmundjes. "Bamlanivimabi, kur jepet herët në rrjedhën e sëmundjes, mund t'i ndihmojë pacientët të eliminojnë virusin dhe të ulin numrin e shtrimeve të lidhura me Covidin, duke mbështetur besimin tonë se antitrupat neutralizues mund të jenë një mundësi e rëndësishme terapeutike për ata që luftojnë me këtë virus", tha Daniel Skovronsky, zyrtari kryesor shkencor i Lilly-t.
Nëse Trampi ka marrë një antitrup eksperimental të prodhuar nga Regeneron Pharmaceuticals përmes një programi përdorimi të dhembshur, Chris Christie, një ish-guvernator republikan i Nju Xhersit, kishte qasje në medikamentin Lilly. Deri në fund të vitit, Lilly parashikon të jenë në dispozicion 1 milion doza të antitrupave monoklonalë. Shtetet e Bashkuara kanë negociuar kontrata për 300,000 doza.