tet212020
Tamponi ultra i shpejtë. Oksfordi zhvillon testin diagnostikues. Synohet të përdoret në zyra, diskoteka, aeroporte
Studiuesit e Universitetit të Oksfordit kanë zhvilluar një test jashtëzakonisht të shpejtë diagnostikues që në më pak se pesë minuta është në gjendje të identifikojë pozitivitetin e coronavirusit të ri Sars-CoV-2.
Metoda është në gjendje të diferencojë me saktësi të lartë Sars-CoV-2, virusin përgjegjës për Covid-19, duke arritur ta dallojë atë nga patogjenet e tjera më të zakonshme të frymëmarrjes, siç janë viruset sezonale. Duke punuar drejtpërdrejt me tamponët faringealë të pacientëve Covid-19, pa nevojën për nxjerrjen e gjenomit, pastrimin ose amplifikimin e viruseve, metoda fillon me etiketimin e shpejtë të grimcave virale në mostër me fije të shkurtra fluoreshente të ADN-së. Më pas, një mikroskop mbledh imazhe të kampionit, me secilin imazh që përmban qindra viruse të etiketuara në mënyrë fluoreshente. Softueri automatik identifikon shpejt dhe automatikisht virusin e pranishëm në mostër. Kjo qasje përfiton nga fakti që lloje të ndryshme të viruseve kanë ndryshime në etiketimin e tyre të fluoreshencës për shkak të ndryshimeve në kiminë sipërfaqësore, në madhësinë dhe formën e tyre.
Synohen kontrolle të shpejta në vendet me shumë njerëz
Studiuesit me këtë projekt synojnë të krijojnë një pajisje të integruar që do të përdoret për të testuar njerëzit brenda zyrave, diskotekave dhe zonave të koncerteve, aeroporteve dhe të gjitha atyre vendeve të mbyllura e me shumë njerëz, që kanë nevojë për kontrolle të shpejta dhe të shpejta, për krijimin dhe ruajtjen e hapësirave "Covid-19 free". Faza e zbatimit parashikon mbledhjen e fondeve për të përshpejtuar prodhimin e një pajisjeje plotësisht të integruar deri në fund të vitit dhe për të filluar zhvillimin e produktit në fillim të vitit 2021, në mënyrë që të kalohet shpejt në një prodhim në shkallë të gjerë.
Cristoforo Zervos