sht212020
Vaksina Covid-19. Komisioni i BE-së nënshkruan kontratë me Sanofi-GSK
Komisioni Evropian ka nënshkruar një kontratë me shumëkombëshet farmaceutike Sanofi dhe Gsk, për furnizimin me një vaksinë të mundshme kundër Covid-19. Kontrata, e dyta e këtij lloji pas asaj të nënshkruar me AstraZeneca-n më 27 gusht, do t'u japë mundësi vendeve anëtare të blejnë deri në 300 milionë doza të vaksinës që po zhvillojnë së bashku Sanofi dhe GSK. Shtetet anëtare të BE-së do të jenë në gjendje të dhurojnë doza të rezervuara për vendet me të ardhura të ulëta. Sanofi dhe GSK do të punojnë për të vënë në dispozicion "shpejt" një pjesë të konsiderueshme të vaksinave përmes një bashkëpunimi me instrumentin për qasjen globale ndaj vaksinave kundër Covid-19 (Covid-19), një shtyllë kushtuar vaksinave në përshpejtuesin për qasje në mjetet Covid-19 për vendet me të ardhura të ulëta dhe të mesme.
Komisioni vazhdon të negociojë marrëveshje të ngjashme me Johnson & Johnson, CureVac, Moderna dhe BionTech, me të cilat i ka përfunduar bisedimet eksploruese. Për Presidenten e Komisionit Ursula von der Leyen "kontrata me Sanofi-Gsk demonstron edhe një herë angazhimin e Komisionit Evropian për të garantuar qasje të barabartë në vaksinat e sigurta, efektive dhe të përballueshme, jo vetëm për qytetarët e saj, por edhe për njerëzit më të varfër dhe më të brishtë në botë".
"Së shpejti - siguron ajo - do të lidhen marrëveshje me kompani të tjera, në mënyrë që të krijohet një portofol i larmishëm i vaksinave premtuese, bazuar në lloje të ndryshme të teknologjive dhe kështu, të rrisim mundësitë tona për të gjetur një medikament efektiv kundër virusit". Sipas Stella Kyriakidesit, komisionere për shëndetësinë, "me shfaqjen, pas verës, të shpërthimeve të reja në vende të ndryshme të Evropës, është e nevojshme më shumë se kurrë një vaksinë e sigurt dhe efektive për të kapërcyer këtë pandemi dhe efektet e saj shkatërruese në ekonomitë dhe shoqërinë tonë". "Kjo marrëveshje e dytë, vazhdon Kyriakidesi, përbën një tjetër moment historik në strategjinë e BE-së për vaksinat. Sot ne po zgjerojmë mundësitë tona për t'u siguruar që qytetarët e BE-së dhe e gjithë bota të kthehen gradualisht në jetën e tyre të përditshme dhe të ndihen edhe një herë i sigurt".
Kontrata me Sanofi dhe GSK financohet nga instrumenti për ndihmën emergjente, i cili ka fonde për ndërtimin e një portofoli të vaksinave të mundshme, me profile të ndryshme dhe të prodhuara nga kompani të ndryshme. Sanofi dhe GSK po zhvillojnë një vaksinë rekombinante kundër Covid-19, duke përdorur teknologji novatore nga të dyja kompanitë. Sanofi, një shumëkombëshe me seli në Paris, lindur në vitin 2004 nga bashkimi i Sanofi Synthélabo me Aventisin, operon në mbi 100 vende, me më shumë se 100,000 punonjës: ajo do të marrë pjesë me antigjenin e saj të proteinës S të Covid-19, bazuar në një teknologji ADN rekombinante. GSK-ja britanike, e lindur në vitin 2000 nga bashkimi i Glaxo VVellcome me Smithkline Beecham, do të vërë në dispozicion teknologjinë e saj ndihmëse, e cila është e një rëndësie të veçantë në situatë pandemike, pasi mund të pakësojë sasinë e proteinave të vaksinës të nevojshme për doza dhe kështu, të japë mundësi për prodhimin e më shumë dozave, duke mbrojtur më shumë njerëz.
Kombinimi i një antigjeni proteinik dhe një adjuvanti është "konsoliduar mirë", vazhdon Komisioni, dhe përdoret në një sërë vaksinash të disponueshme për të rritur përgjigjen imune. Ai mund të përmirësojë gjithashtu gjasat për të patur një vaksinë efikase, që mund të prodhohet në masë të gjerë.
Kompanitë filluan një studim të fazës 1/2 në shtator, i cili do të pasohet nga një studim i fazës 3 deri në fund të vitit 2020. Nëse është i suksesshëm "dhe iu nënshtrohet vlerësimeve rregullatore", kompanitë synojnë ta kenë vaksinën të disponueshme deri në gjysmën e dytë të vitit 2021. Së bashku me shtetet anëtare dhe Agjencinë Evropiane të Barnave, komisioni do të përdorë mjetet ekzistuese të fleksibilitetit për të përshpejtuar autorizimin dhe disponueshmërinë e vaksinave efektive kundër Covid-19.
Procesi rregullator do të jetë fleksibël, por "do të mbetet i fortë". Çdo vaksinë e vendosur në tregun e BE-së "do të duhet të plotësojë kërkesat e nevojshme të sigurisë dhe t'i nënshtrohet vlerësimit shkencor nga Agjencia Evropiane e Barnave, si pjesë e procedurës së autorizimit të marketingut në BE".