nën112019
Depresioni madhor. Disa antiinflamatorë janë të dobishëm në kontrollin e simptomave. Ja, se cilët...
Sipas një rishikimi të provave, të publikuara në "Journal of Neurology Neurosurgery & Psychiatry", agjentë të ndryshëm antiinflamatorë, përfshirë aspirinën, paracetamolin, statinat dhe antibiotikët, mund të ndërhyjnë në simptomat e depresionit të madh në mënyrë të sigurt dhe efikase dhe efektet janë edhe më të forta kur këtyre agjentëve u shtohet trajtimi standard antidepresiv.
Rreth një e treta e njerëzve me depresion klinik nuk i përgjigjen mirë terapisë së tyre dhe zakonisht vuajnë nga efekte anësore të barit. "Shumë të dhëna të shfaqura sugjerojnë se inflamacioni kontribuon në zhvillimin e depresionit të madh, por rezultatet e provave klinike me agjentë të ndryshëm antiinflamatorë për të trajtuar këtë gjendje kanë rezultuar jopërfundimtare. Kjo është arsyeja pse kemi dashur të rishikojmë provat e disponueshme dhe të vlerësojmë nëse agjentët antiinflamatorë funksionojnë më mirë sesa placeboja, vetëm ose së bashku me trajtimin standard", shpjegon Shuang Bai (Universiteti Huazhong i Shkencës dhe Teknologjisë në Vuhan, Kinë), emri kryesor i studimit.
Antiinflamatorët e vlerësuar në 26 studimet e ekzaminuara ishin barna antiinflamatore josteroide (FANS), acide yndyrore omega 3, frenues të citokinës, statina, steroide, minociklinë, modafinil dhe N-acetil cisteinë. Analiza e të dhënave agregate sugjeroi që agjentët antiinflamatorë funksionojnë më mirë sesa placeboja dhe përmirësojnë efektet e trajtimit standard kundër depresionit. Në fakt, këto barna ishin 52% më efikase në zbutjen e ashpërsisë së simptomave në përgjithësi dhe 79% më efikase në eliminimin e simptomave, në krahasim me placebon.
Analizat më të hollësishme kanë treguar që FANS, acidet yndyrore omega 3, statinat dhe minociklinat janë barnat më efektive në reduktimin e simptomave kryesore depresive në krahasim me placebon dhe se efektet ishin edhe më të mëdha nëse antiinflamatori i shtohej trajtimit antidepresiv standard. Megjithatë, agjentët antiinflamatorë nuk dukej se përmirësonin cilësinë e jetës, megjithëse, sipas autorëve, kjo mund të ishte pasojë e numrit të vogël të studimeve të ekzaminuara. Nuk u vërejtën efekte të rëndësishme të padëshirueshme afatshkurtra. "Rezultatet e këtij rishikimi sistematik sugjerojnë që agjentët antiinflamatorë luajnë rol antidepresiv te pacientët me çrregullim të depresionit madhor dhe janë të sigurt në mënyrë të arsyeshme", përfundojnë autorët.
J Neurol Neurosur Psych 2019. Doi: 10.1136/jnnp-2019-320912
http://dx.doi.org/10.1136/jnnp-2019-320912