qer212019
FDA: Kujdes nga integratorët me vinpocetinë! Gratë në moshë fertile të lexojnë mirë etiketat...
Në një deklaratë të ditëve të fundit, Administrata Amerikane e Ushqimit dhe e Barnave (FDA) ka paralajmëruar gratë në moshë fertile, që t'i kushtojnë vëmendje përdorimit të vinpocetinës sintetike që gjendet tek integratorët, ose si produkt i pavarur. Sipas të dhënave të shqyrtuara nga FDA-ja, mes të cilave edhe një raport i ri i Programit Kombëtar të Toksikologjisë (NTP) nga Instituti Kombëtar i Shëndetësisë (NIH), në fakt, konsumimi i vinpocetinës është i lidhur me efekte të padëshirueshme në riprodhim, mund të shkaktojë aborte ose dëmtim të zhvillimit të fetusit, madje edhe me doza të krahasueshme me një marrje të vetme.
FDA-ja ka theksuar se në etiketa, vinpocetina quhet nganjëherë ekstrakt i vincës minore, ekstrakt i pervincës minore ose ekstrakt i zakonshëm i pervincës dhe shpesh është i pranishëm në produktet e tregtuara për të shtuar kujtesën, vëmendjen ose mprehtësinë mendore, për humbje peshe ose shtim energjie. Autoriteti rregullator shpjegon se në disa vende jashtë Shteteve të Bashkuara, vinpocetina jepet madje me recetë dhe thotë se është gati të analizojë situatën për të parë nëse ky produkt mund të shitet ligjërisht si integrator.
FDA-ja ka marrë në të shkuarën prezantime të vazhdueshme dhe të shumta të të dhënave të paramarketingut mbi sigurinë e një përbërësi të ri dietik, siç është vinpocetina në integratorët ushqimorë dhe numri i produkteve në treg që e përmbajnë, është aktualisht shumë i lartë. Agjencia, më në fund, ka shprehur angazhimin e saj në inkurajimin e kompanive që tregtojnë produkte me vinpocetine, që të verifikojnë etiketimin e tyre për t'u siguruar që ai përmban paralajmërime kundër përdorimit nga gratë shtatzëna dhe nga gratë që mund të mbeten shtatzënë.
"Tregu i shtesave ushqimore është një sektor në rritje, ku shitjet janë shumëzuar me të paktën dhjetë herë në 25 vitet e fundit dhe më shumë se gjysma e popullsisë merr të paktën një shtesë ushqimore në mënyrë të rregullt. Edhe për këtë arsye, FDA-ja ka njoftuar se po bën përpjekje të reja për të forcuar rregullimin e këtyre produkteve, duke modernizuar kuadrin e tyre rregullator", përfundon FDA-ja.
FDA - Deklaratë për shtyp
https://www.fda.gov/news-events/press-announcements/statement-warning-women-childbearing-age-about-possible-safety-risks-dietary-supplements-containing