nën302018
Reaksionet negative. Studimi i fundit përditëson rreziqet e cefalosporinave...
Antibiotiku cefepime, i familjes së cefalosporinave, i marrë në doza të papërshtatshme ose të ndryshme nga ato që këshillohen, mund të shkaktojë reaksione të rënda neurologjike, veçanërisht te pacientët me insuficiencë renale. Këtë e kanë komunikuar në një shënim informues për profesionistët e shëndetit, Bristol-Myers Squib, Polifarma dhe Bruno Farmaceutici, në marrëveshje me Agjencinë Italiane të Barnave (AIFA).
Shënimi saktëson se "pjesa më e madhe e rasteve të neurotoksicitetit është verifikuar te të sëmurët me insuficiencë renale, që kanë marrë doza më të larta se ato që janë këshilluar, veçanërisht te pacientët e moshuar. Megjithatë, janë shënuar raste të verifikuara te pacientët me funksion normal renal dhe që merrnin doza më të mëdha se ato të rekomanduara. Në përgjithësi, simptomat e neurotoksicitetit janë zhdukur pas ndërprerjes së trajtimit dhe/ose pas hemodializës; sidoqoftë, disa raste kanë pasur rezultat fatal". Përveç kësaj, AIFA paralajmëron mjekët që japin recetën se te "pacientët me disfunksion renal (kleranca e kreatininës < / = ml/min), është i nevojshëm një rregullim i dozimit" dhe se "në rastin e përdorimit shoqërues të barnave potencialisht nefrotoksike si aminoglikosidet dhe diuretikët e fuqishëm, është e nevojshme që të kontrollohet me kujdes funksioni renal". Përveç kësaj, "në rastin e çrregullimeve neurologjike ose të përkeqësimit të tyre, mund të dyshohet për një mbidozim të cefepimes; diagnoza mund të konfirmohet nga përqendrimet e saj plazmatike".
Cefepime, kujton AIFA, është një antibiotik për përdorim parenteral, që i përket familjes së cefalosporinave, për shkak të spektrit të gjerë të veprimit që është indikuar në trajtimin e infeksioneve bakteriale të shkaktuara nga bakteret e ndjeshme ndaj barit. Është "e rëndësishme që të përdoren dozat e rekomanduara në përmbledhjen e karakteristikave të produktit dhe të modifikohet dozimi edhe gjatë trajtimit, në bazë të funksionalitetit renal, sapo kleranca e kreatininës te pacientët të arrijë (të zbresë në) 50 mL/min ose më pak, për të kompensuar eliminimin më të vogël renal. Kjo është edhe më e rëndësishme për pacientët e moshuar me insuficiencë renale. Doza fillestare e rekomanduar e cefepimes te pacientët me disfunksion renal të lehtë duhet të jetë e njëjtë me atë të pacientëve me funksion renal normal, por duhet të reduktohet kur kleranca e kreatininës së pacientëve është < / = 50 mL/min. Doza e ruajtjes që rekomandohet për cefepimen te pacientët adultë me insuficiencë renale është dhënë në tabelën që gjendet në përmbledhjen e karakteristikave të produktit.