maj312018
FDA: Të hiqen nga banakët produktet me benzokainë për bebet! Janë të rrezikshme.
FDA-ja ka bërë një njoftim për konsumatorët, që të reshtin së përdoruri barna të banakut që përmbajnë benzokainë, përfshi ato që përdoren për trajtimin e dhimbjes së dhëmbëve te foshnjat dhe fëmijët nën dy vjeç. Barna të tilla shkaktojnë në të vërtetë një shtim të rrezikut për metemoglobinemi, një patologji që mund të shkaktojë edhe vdekjen, duke reduktuar dukshëm sasinë e oksigjenit të transportuar nëpërmjet gjakut.
Agjencia, pas monitorimit të rrezikut, ka vlerësuar se ka patur më shumë se 400 raste me metemoglobinemi, të sinjalizuara apo të publikuara në literaturë, që nga viti 1971. Shenja dhe simptoma të sëmundjes mund të shfaqen nga pak minuta, deri në dy orë pas përdorimit dhe mund të manifestohen pas përdorimit të parë dhe pas ekspozimeve të shumëfishta. Disa nga shenjat janë: zbehje, ngjyrë gri dhe blu të lëkurës, buzëve dhe thonjve, mungesë frymëmarrjeje, lodhje, dhimbje koke, marramendje dhe rrahje të shpeshta të zemrës.
Pacientët me sëmundje kardiake apo probleme respiratore, të tilla si astma, bronkiti apo enfizema, si dhe të moshuarit, janë në rrezik më të madh për të zhvilluar këtë patologji.
Agjencia shpreson që ndërmarrjet të reshtin së shituri produkte për trajtimin e dhimbjes së dhëmbëve te të sapolindurit dhe te fëmijët më të vegjël se 2 vjeç dhe ka konfirmuar se do të marrë masa zyrtare që ato të hiqen nga farmacitë. Benzokaina përdoret edhe në produktet për trajtimin e dhimbjes së grykëve, ulçerimit nga kanceri dhe të tjera irritime orale dhe është në shitje në formë xheli, spërkatësi, pomade apo tabletash.
"Duke marrë parasysh të dhënat gjithnjë e më të larta për lidhjen e benzokainës me metemoglobineminë, po marrim masat e nevojshme për të punuar me industrinë në mënyrë që të ndërpresim shpërndarjen dhe shitjen e produkteve të banakut që përmbajnë benzokainë, të destinuara për dhëmbët dhe të shtojmë informacione paralajmëruese mbi metemoglobineminë dhe një kundërindikim kundër përdorimit për dhimbjen e dhëmbëve dhe kundër përdorimit te fëmijët nën dy vjeç për produktet farmaceutike të higjienës orale që përmbajnë benzokainë", thotë Janet Woodcock (Qendra për Zhvillim dhe Kërkim të Barnave, FDA). Si pjesë të veprimit, agjencia do të kërkojë që, edhe në anestetikët lokalë që jepen me recetë, të shtohen paralajmërime të përditësuara mbi rrezikun e kësaj patologjie.
FDA - Drug Safety and Availability
https://www.fda.gov/Drugs/DrugSafety/ucm608265.htm