jan302018
Degjenerimi makular. Mjekët britanikë mbështetin përdorimin e bevacizumab-it të paautorizuar
Këshilli i Përgjithshëm Mjekësor u ka dhënë mbështetjen e tij mjekëve që përshkruajnë bevacizumab-in (Avastin) për të mjekuar degjenerimin makular të lidhur me moshën (AMD). Ky indikim që shkon përtej licencës së barit, ka marrë mbështetjen e Kolegjit Mbretëror të Oftalmologëve, pasi Instituti Kombëtar për Shëndet dhe Kujdes (NICE) ka treguar se bari është i sigurt dhe efikas po aq sa trajtimet e autorizuara.
Në pritjen e gjatë për të përcaktuar një udhëzim për AMD-në, NICE rekomandon që personat që dyshojnë se kanë formë të rënduar të sëmundjes duhet të dërgohen menjëherë në shërbimin okulistik për një diagnostikim të menjëhershëm dhe për të nisur trajtimet efikase. Pas konfirmimit të sëmundjes, brenda 14 ditësh duhet përshkruar një bar antifaktor për rritjen endoteliale vaskulare (anti-VEGF). Komiteti i orientimit është përballur me një efikasitet klinik dhe një siguri të barasvlershme mes agjentëve të ndryshëm anti-VEGF: aflibercept, bevacizumab e ranibizumab.
Por, vetëm ranibizumab-i (tregtuar nga Novartisi, me emrin Lucentis) dhe aflibercept-i (Eylea, nga Bayer) mund të marrin rekomandimin e plotë nga NICE, pasi vetëm ata kanë autorizimin për hedhjen në treg me qëllim përdorimin për trajtimin e AMD-së. ROCHE-ja nuk e ka kërkuar kurrë këtë autorizim për bevacizumab-in. NICE-ja është kufizuar kështu në sugjerimin që mjeku, në momentin e përshkrimit të barit, duhet të ndjekë orientimet profesionale të Këshillit të Përgjithshëm Mjekësor, duke mbajtur përgjegjësi të plotë për vendimin e tij dhe duke mos neglizhuar as koston më të ulët të një bari, në krahasim me një tjetër.
"Nëse mjekët bashkëpunojnë me pacientët, duke ndjekur indikacionet klinike dhe duke marrë vendime përshkrimi barnash me siguri të plotë, në bazë të provave dhe të eksperiencës, një përdorim i mundshëm i bevacizumab-it nuk do të na shkaktonte asnjë problem, me kusht që të jetë marrë gjithmonë pëlqimi i dokumentuar", thotë Charlie Massey (Këshilli i Përgjithshëm Mjekësor).
Veç kësaj, një hulumtim i vitit 2016 kishte vlerësuar se përdorimi i bevacizumab-it për të gjitha indikimet oftalmologjike të përshtatshme, do t'i kishte kursyer Sistemit Shëndetësor Kombëtar Anglez (NHS) plot 539 milionë sterlina në vit.
Bayer-i dhe Novartis-i, nga ana e tyre, kanë kërcënuar se do të ndërmarrin masa ligjore kundër 12 autoriteteve të NHS-së, që kanë planifikuar ta ofrojnë bevacizumab-in për të trajtuar patologjitë oftalmologjike.
British Medical Journal 2018. doi: 10.1136/bmj.k344
http://www.bmj.com/content/360/bmj.k344