Një studim i cili do të ekzaminonte efektet kardiovaskulare të barit anti-obezitet Contrave mbi 9 mijë pacientë, është ndërprerë para kohe nga studiuesit e "Cleveland Clinic".
Administrata e Barnave dhe Ushqimit në SHBA e kishte aprovuar Contrave-n (një kombinim mes naltrexon-it dhe bupropion-it) në vitin 2014 duke u bazuar pjesërisht në analizën e studimit Light Trial, i cili përjashtonte rritjen e ndjeshme të riskut kardiovaskular pas përdorimit të barit. Në atë kohë studimi kishte arritur në 25% të rezultateve duke u bazuar vetëm në 94 raste me efekte anësore kardiovaskulare: 59 nga placebo dhe 35 nga Contrave. Rezultatet duhet të mbeteshin konfidenciale, por një nga prodhuesit e barit, "Orexigen", i ndau ato me një grup të gjerë personash, thuhet në komunikatën për shtyp të "Cleveland Clinic".
Në muajin mars, rezultatet u bënë pronë publike kur "Orexigen" i përdori për të mbështetur një kërkesë për patentë. "Rrjedhja e 25% të të dhënave të analizës e bën të pamundur kompletimin e studimit. Në këtë pikë do të bëhen publike edhe 50% e rezultateve të tjera të studimit, që nuk i konfirmojnë përfitimet kardiovaskulare siç pretendon Orexigen", pohon në një intervistë koordinatori i komitetit shkencor të Cleveland Clinic, Steven NIssen. Në fakt, "analiza përmban rreth 192 raste efektesh anësore kardiovaskulare: Avantazhet e hasura në tremujorin e parë të studimit u kthyen në disavantazhe në tremujorin e dytë, ku kishte 43 efekte anësore nga placeboja dhe 55 nga Contrave", pohon Nissen.
Dhe përfundon: "Mospërputhja mes efektet kardiovaskulare të vëzhguara në analizën e parë dhe të dytë tregon qartë risqet e përdorimit të barit, si edhe motivin pse rezultatet e një studimi të papërfunduar duhet të mbeten konfidenciale deri në fund të tij".