nën112014

FDA miraton vaksinën e parë në SHBA për meningjokokun B

Administrata e Barnave dhe Ushqimit në Shtetet e Bashkuara (FDA) ka aprovuar vaksinën e parë për të parandaluar sëmundjen invazive të meningjokokut, të shkaktuar nga grupi B Neisseria Meningitis, në personat e moshës 10-25 vjeç.
Sëmundja e meningjokokut është një patologji që rrezikon jetën, shkaktuar nga bakteret që infektojnë gjakun (sepsi) dhe cipën që mbulon trurin e palcën kurrizore (meningjiti). Meningitidis N. është një ndër shkaqet kryesore e meningjitit bakterial. Bakteret transmetohen nga personi në person nëpërmjet sekrecioneve të frymëmarrjes (si p.sh., përmes kollitjes, puthjeve, përdorimit të pirunjëve lugëve të përbashkëta). Sipas qendrës për Kontrollin dhe Parandalimin e Sëmundjeve (Centers for Disease Control and Prevention), në vitin 2012 u raportuan rreth 500 raste me sëmundjen e meningjokokut në Shtetet e Bashkuara dhe nga këto, 160 janë shkaktuar nga grupi B.
Meningjokoku mund të trajtohet me antibiotikë për të zvogëluar riskun e vdekshmërisë ose probleme të rënda afatgjata, por është shumë i rëndësishëm nënshtrimi i menjëhershëm ndaj kujdesit mjekësor. Vaksinimi është mënyra më efektive për të parandaluar meningjokokun. Deri më sot, vaksinat për këtë sëmundje të miratuara në Shtetet e Bashkuara janë përqendruar vetëm në katër nga pesë grupet kryesore të bakterit N Meningitidis: A, C, Y dhe W.
Për këtë sëmundje janë zhvilluar tre studime në SHBA dhe Evropë, të cilat kanë përfshirë rreth 2.800 adoleshentë. Mes pjesëmarrësve që morën tre doza të vaksinës, 82% e tyre zhvilloi antitrupa në gjak, të cilat mund të vrasin katër variacione të ndryshme të grupit B të Meningitis N.
Po ashtu, siguria e vaksinës kundër meningjokokut B u vlerësua në rreth 4.500 individë të cilët morën pjesë në eksperimente të organizuara në SHBA, Evropë dhe Australi. Efektet anësore më të raportuara nga ata që iu nënshtruan vaksinimit ishin dhimbjet dhe ënjtjet në vendin e injektimit, dhimbje koke, diarre, dhimbje të muskujve, lodhje dhe ethe.
FDA ka përdorur procedurën e miratimit të përshpejtuar për vaksinën e meningjokokut B. Kjo procedurë lejon aprovimin e barnave për sëmundjet të rënda ose me rrezik për jetën, bazuar në dëshmi të efektivitetit të produktit, duke reduktuar kohën e nevojshme për hedhjen në treg të tyre. Vaksinës në fjalë gjithashtu iu dha statusi i ''terapisë inovative''./ AIFA